ЗАIАПХОЙ ОРГАНИЗАЦЕЙ АССОЦИАЦИЯ
ГIалгIайчен Мехкадаьна Евкурнаькъан Баматгирей Юнусбека ларца, вай мехка вIашагIъеллай заIапхой организацен ассоциация. Цун презентация еш, наха из хьайовзийташ, декабрь бетта 22-ча дийнахьа Сунжерча культура цIагIа вIашагIкхийтта хилар дукха Iаьдала а, юкъара болх лелабеча а урхалений къахьегамхой. Уж гулбаьбар укх керда вIашагIъеллача заIапхой организацей ассоциация керттера болх малагIа ба а, цо кхоачашде деза декхараш малагIаш да а дашхардухьа. Аладеза цу ассоциацен юкъе яхай заIапхошца болхбеш йола вай мехкара массехк юкъарло, хIаьта цун кульгалде хержа оттаяьр я вай мехкарча заIапхой цхьоагIон тхьамада йола Колой Хьава.
Ер ассоциация вIашагIъеллай заIапхошта нийслушйола духьаленаш, цу хьаькъе къахьегаш йолча организацешца цхьана, Iаьдала урхаленаша, тохкам а беш, болх дIахьоргболаш. «Тахан дукха нийслу Iаьдала викалашца мара тха хьал диза а хьакхоачашде а аьттув ца боалаш гIулакхаш. Iаьдало а юкъара къахьегамхоша а цхьана из болх хьабеш хилча, аттагIа вIаштIехьдоал моллагIдола хIама. Цудухьа дикага догдоахаш да тхо, ер ассоциация вIашагIйолларца. Тхоай низ дIакхоачачох, тхо къахьегаргдолаш да, вешта наха а укх гIулакха тIехьа шоай аьттонга хьежжа гIо-новкъостал деш хилча, ма хетта вIаштIехьа баргба вай болх», – йоах заIапхой организацей ассоциация тхьамада йолча Колой Хьавас.
«Ер мо долча хIаманна тIехьа вIашагIъелла урхале яле а, е кхыйола юкъарал яле а, вIаший дага а бувлаш, болх дIакхохьаш хила беза. МоллагIа вале а, мехка юкъархо хила йиш йолаш ва вайх хIаравар. Сога мича кхоача из, аьнна а ца хеташ, къахьегаш вай хуле, из болх дIабахьа вай массане а дика вIаштIехьа даргда. Цудухьа хIара мехка вахархо декхарийла ва шийна гонахьарча наьха хьал теркалдеш хила», – аьлар Мял яхача фонда кульгалхочо Дзейтнаькъан Лейлас.
Укхаза метте вена хилар ГIалгIайчен мехкадаь викал. Цо дийкъар шоаш могашбоацаш а болаш, заIапхой организацешка болх беш болча къахьегамхошта лаьрхIа ГIалгIайчен мехкадаь цIерах дола сийлален совгIаташ.
Тахханалца беча балха тIехьа хало, духьаленаш нийсъеннаяле а, хIанзчул тIехьагIа из гIулакх аттача даргхиларах тийша бар заIапхой организацен викалаш. ХIана аьлча, дукхача укхаза баьхкача наха шоай болча аьттонца, царна новкъостал дергда, аьнна, дIатIаийцар. ТIехьарча хана Iаьдала викалаша геттара новкъостал ду юкъара болх лелабеча къахьегамхошта. Юкъархой а, Iаьдала викалаш а, шоайла дага а бувлаш, эшар фуд а хьожаш, цхьана хуле, гIулакх аттача даргда, тIаккха мел хала хиларах хьалдузалургда из.
Матенаькъан Илез
